Ok'thuili awunganao kachungkha rapharai,
Kha Varenao katha khipakha maleima:
Huikhame Awunga moreiwui kakhanang
Van ngasak kida okathuili rapharai.
Ringphada soserlu, okathui, kazingram!
Kaphara Awunga Jesuwui ming singda;
Vare Nao Mayara ithumli huikida,
Bethl'hemwui seishimli rapharami haira.
Kazingraobingna ngaya sailung sochikat,
Pao chi yaokahombingli rimeikapta hang.
Yaokahombing china yaobingli horhaida,
Awunga Proholi phavada akhorum.
Zimiksho shongwui maheikathembing-nala,
Kahora Sirawui kathanli shurvada,
Athumna Bethl'hemli vashungda phavaya,
Sinala, lupala, kasak ot achikat.
Awunga Herodna pao chi shada khanang,
Zingshoshong kathembing athumli ngahankhui
Awunga Ishameili shaothat khavai sai,
Kha awui khangaran chi maungshung mana.
He Jesu aja zimiksho ithum wuklung,
Seishim katha hili khara ngasam milu.
Ringkashi, kathai-kacham morei kaphungbing,
Bethl'hemwui Sira chi theilaga ninglumra.